فنيلة طرزان
بابا شف حمودي يلعن ، بابا ترى سارة كبت العصير على المرتبه ، واااااااااااااااااااااااء << ولد متعسر ويصيح ولا يبي شي بس نكد ، بابا افتح فشفاشي ، بابا عطني علك طاح علكي ، بابا شغل المسجل << عائله سعودية في سيارتهم ، كل شي على بابا واذا عصب عليهم الاب وقال للمدام اعنبوا ابليسك الحين ورى ما تسكتين عيالتس ، ناظرتهم بثقل طينه وقالت سارة عطيني منديل وياويلكم ان صجيتوا ترى ابعلم ابوكم .
وصلت هالعائلة للثمامة واخذ الاب الاولاد وراح يركبهم الدبابات وقام الطفل الرضيع ابو سنة ونص يصيح يبي رضعته المعتادة وطبعا كأي ام سعودية عندها بنت عمرها عشر اعوام تلقى كل شغل هالبزر عليها هي اللي تغير له وتصلح له رضعته ، فقالت الام لبنتها سارة قومي صلحي لاخوتس كنديشن رضعته ، قامت البنت وخذت الديد وحطت ست ملاعق كيكوز واخذت ثلاجة الموية الحارة علشان تكمل تحضير الرضعه توها تصب من ثلاجة الموية طاحت منها الثلاجة وانكسرت سمعتها الام وقالت عمى يعميتس ما تشوفين يالله دوري في سيارة ابوك موية صحة وزوديها ، راحت سارة تدور في السيارة ومالقت شي ، تلفت يمين يسار وتلقى لها قارورة صحة فيها اقل من الربع تحت جدار الدكه اللي اهلي جالسين فيها ، خذتها وفتحتها وشمت ريحة كريهه ( قارورة عرق ) ، لكنها توها صغيره ولا تعرف هالامور وانا صياحي كل ماله ويزيد وامي تصارخ عليها بسرعه ، خذت ساره قارورة العرق وزادت الديد الى رقم ستة وخضت الديد وسدحت ابو الكنادش ودست الديد في فمه ، ومن اول رشفتين طلعت مخاطتي وجاني احساس اني من الاربعين اللي فتحوا الرياض ، وكل ما رفعت امي بيالتها بتشرب شاهي طقيت بيالتها بالديد وشربت ، شوي الا انا قالب الديد وارضع تجي امي تعدل الديد وامسك يدها والعب بحواجبي لها ، تحسبني الوالدة شبعت وقمت العب وتمسكني امي تبي تطق ظهري علشان اتغر لكن المشكله اني (طقعت) واقوم اطرش ويوم بغيت اصيح بدال ما اقول وااااااااااااااااااااااااء صرت اقول ودااااااااااااااااان ودااااااااااااانه قامت امي تناظرني بعين استغراب وهي خايفه عليّ وتحطني علشان امشي وماش كن فيني جنون البقر صارت رجليّ متخولفه واحس اني امشي على اسفنج ، صاحت امي وقامت تنادي ابوي وجاء الوالد مسرع يبي يشوف وش السالفة ، وشفيكم احد جايكم والا قايل لكم شي قالت الوالده لا ، بس كنديشن مدري وش فيه مهوب طبيعي ويسوي حركات كنه خبل ، شالني ابوي وخضني شوي واطرش عليه واقول له بأبأ << لاحظوا الهمزات ، حثمت ( يعني خشمك مسكت كالعادة على مرجله ) ، قال ابوي تطريش وشهاق وحب خشوم عسى مهوب سكران ، بس وين يسكر هالبزر منه وسأل امي هو لاعب في الرماد << العن ابو القراوى شف وين يلعبون فيه ، والا كاب مويه حارة ، قالت امي ابد قام يصيح وسوينا له رضعه وعقبها احس ان الولد مو طبيعي ، قال ابوي نوع حليبه وشو ، صلحوا لي منه ، قالت امي كيكوز قال ابوي كيكوز حاف يعني ما بعدها ( ليبل ) قالت امي ترى مدري وش انك تقول بس يالله خلنا نوديه للمستشفى ، ناظرها ابوي وقال طيب ما يمدينا نروح للبيت شوي وبعدين نوديه ، قالت امي انت على فكره تفكيرك وسخ انا وين وانت وين .
خذني ابوي للمستشفى وعلى طول اخذوا لي تحاليل يوم طلعت النتيجة قال الدكتور لابوي الولد هذا كم عمره قال ابوي سنة ونص ليه عسى ما فيه شي كايد قال الدكتور هو الحقيقه من جهة كايد فهو كايد لكنه ما يخوف قال ابوي يادكتور تراك لخبطتني ولدي وش فيه بالضبط ، قال الدكتور ولدك بعد نتائج التحاليل اتضح انه ( سكران ) تفاجأ الوالد وقال سكرااااااااااااااان يادكتور انا تخرجت من الجامعه ولا عرفت اطلع الدخان من خشمي ، يعني اللي اقصده يادكتور ان عائلتنا محافظة ولا لنا بالسوالف هذه ، وبعدين اذا هالولد عمره سنة ونص وسكران اجل اذا جاء عمره سبع سنين بيصير جرار ، قال الدكتور هذا اللي صاير والتحاليل تأكد على كذا وبنضطر اسفين لتحويله للجهات المختصة في المستشفى .
رحنا لشرطة المستشفى ونلقى بدوي وكيل رقيب يسمع بالتحقيق :
وكيل رقيب : ابك السكران وينه كلبشوه
ابوي : كان تكلبشه بمغاط ، السكران هذا << ويأشر علي
وكيل رقيب : الورع ذا هو السكران ، ياوالله الذيب
ياعريف << بكسر العين ، افتح المحضر
وكيل رقيب : انت ياورع وين كنت البارح الساعة قيمة عشر من الليل
ابوي : وانت من صدقك بتحقق مع بزر عمره سنة ونص
وكيل رقيب : ايه بنحقق معه انا ماسكينه وهو يصلي بجماعته انا ماسكينه سكران
ابوي : وش ماسكينه انا اللي جايبه ، بس تدري انا بروح لمدير المستشفى واتفاهم معه وما يكون الا الخير .
راح ابوي لمدير المستشفى ، وبعد ما شرحت لهم اختي وشلون سوت لي الحليب عرفوا ان القارورة اللي لقتها كانت قارورة عرق ، قال المدير خلاص انا بدبرها بطريقتي الخاصة وانت خذ ولدك ورح .
رجعنا للبيت وانتشر الخبر في الحارة وصاروا اهلي والجيران وعيال الحارة ما يسموني الا السكران حتى الجلف غيّر اسم كاكا في الجوال الى خوي السكران وكل ما كبرت صرت اتضايق منها ، وصارت ثقتي بنفسي مهزوزة مره بغيت اسوي راعي غزل وارقم بنت ذبيت عليها ورقه مكتوب فيها ( خالد 050 الجزء الاول ) خخخخخخخخخخخخخخخخخخ ، ومع الحماس ومتابعة الوالد وتشجيعه صرت رجال وتخرجت من الجامعه وخلاص فعلا صارت تنرفزني كلمة سكران ومن قالها تهاوشت معه ، وفي يوم من الايام قابلني واحد من عيال الحارة اسوووووووووووود صدقي ، وقال لي وش عند السكران يدور هنا ، بيني وبينكم قفلت معي واقول في نفسي ما بقي الا هالكويحه يتريق علي ناظرته وقلت له ان ما عقلت ترى ابدخل اصابعي في خشمك ودربي وجهك ياكورة البولينق ، ضحك الخال وقال بس ما راح تقدر تطق القوارير لانك سكران ، قلت له انت تدري يوم ان امك حامل بك وخذوا لها اشاعه حمل طلع في الاشاعه عبارة مكتوب فيها ( نقليات سابك للحديد ) ، قال وانت يوم خذوا اشاعه لامك طلع لهم ( بار ) << العن ام الخال يذب ، قلت طيب تعرف ان امك مسويه عملية قيصرية يوم تجيبك مع العلم ان وضعك في الرحم كان سليم يعني راسك تحت ، بس علشان عرادتك انتفشت في الرحم ما قدروا يطلعونك الا بعملية قيصرية ، يوم تفجحت مناخره وشميت ريحة التماس كهربائي ، جاء لمي ومسح بي شوارع الحارة وصاروا يسموني السكران مساحة الخال .
بعدها قررت اني اسوي شي يخليني مشهور في الحارة ويصير الناس كلهم ودهم يتقربون مني ، ويوم كنت ادرس في الجامعه كان معنا واحد ابوه يشتغل مخرج في التلفزيون رحت له وقلت له تكفى قل لابوك يدور لي أي شغله بس اهم شي اني اطلع في التلفزيون ، كلم ابوه وما قصر قال خله يجي لمي واشوفه ويصير خير ، رحت وقابلت ابوه وقال ماشي عندنا منتج سعودي ونبي نسوي له دعاية انت ما عندك مانع تشتغل معنا قلت ابد قال ولا تبي تعرف وشو المنتج قلت ولا ابي اعرف اهم شي اطلع في التلفزيون ، قال اجل خلاص الخميس الجاي تعال لمي في التلفزيون علشان اعلمك وش تسوي .
رحت للتلفزيون وشرح لي الموقف وهو عبارة عن ، اني انا يابو الكنادش راكب دباب ونازل من جبل بسرعه فائقه ويكون فيه حاجز واطمره ثم يطلب مني اعادة اللقطه وبرضه انزل بالدباب من الجبل بس هالمره يردني الحاجز ، قلت في نفسي حلو دعاية دبابات بتكون مسكته لاهل الحارة كلهم ، وفعلا سوينا المشهد وصورناه وقال لي خلاص بعد اسبوعين بتعرض في التلفزيون ، رجعت للحارة وانا كلي شموخ وغرور ومن مر من جنبي وقال السكران مساحة الخال قلت له اصبروا بعد اسبوعين وبيصير ودكم تكلمون السكران لاني ابطلع في التلفزيون ، ويوم قربت هالاسبوعين تنتهي صار يجيني مكالمات من بنات الحارة والشباب يسلمون علي باحترام ويسموني كنديشن فهمي ، ومرت هالاسبوعين كنها سنتين وفي اليوم المحدد عرفوا كل اهل الحارة اني ابطلع في التلفزيون بعد الاخبار مباشرة والكل يترقب المشهد وفعلا جاء المشهد وخلال المشهد ما سكت تلفوني بس يوم جت اللقطه الحاسمة وجاء بينتهي المشهد جت الطامة الكبرى لانه بعد ما ردني الحاجز في الدعاية طلع على الشاشة صورة بزر يضحك وعبارة مكتوب فيها :
( بامبرز وحدها تحميك من التسرب )
خمس دقايق الا وشباب الحارة كلهم موقفين عند بابنا ويضربون بواري ويقولون الزق السكران مساحة الخال ، انا لله انا نبي نتخلص من السكران ومساحة الخال وجانا شي اردى منهم ، ناظرني ابوي وهو مدنق براسه وقال افاااااااااا يعني انت قايم ببطولة ( زق ) وانا ابوك ، قلت له الظاهر كذا يابابا ، والله ويشنقل الوالد وتجيه جلطه ولا صار يتكلم ولا يمشي ، صار متلطم واذا بغى الحمام قام يبكي حاولت اعالجه في كل المستشفيات ولا لقيت له علاج ، اخر شي قررنا انا نقرا عليه عند شيخ ، ورحت وجبت شيخ يقرأ عليه وبعد ما قرأ عليه الشيخ خمسة ايام قال الشيخ ابوك جايته صدمه قويه وعلشان يطيب ابوك لازم تسوي عمل بطولي او عمل خارق للعادة وابوك في هالحالة مهوب طيب الا اذا جبتوا له غسال ( فنيلة طرزان ) << عاد طرزان يلبس فنيله بعد انت ،
وبدت مشكلة طرزان وين ابلقاه فيه ، سألت عنه واللي يقول لي بتلقاه حارس في صالة افراح واللي يقول بتلقاه في الغابة السعيده في اسواق العثيم الين طرحني الله في واحد فاهم وقال ياولدي هذا بتلقاه في غابات افريقيا قلت ما تعرف بالضبط وينه فيه قال الا فيه محل يبيع قرص عمر بتلقاه جنبه ، ياولدي انت تسأل عن طرزان رح لافريقيا واسأل عنه وبتلقاه .
حزمت حقائبي << وش هالحقائب كلها كابات لانهم يقولون ان الايدز منتشر عندهم ( غمزه ) ، وسافرت من ديره لديره الين استقريت في كينيا في غابة سمعت ان طرزان اخر مره شافوه فيها ، ويوم دخلت هالغابة لقيت نقاط تفتيش كثيره واجراءات امنية مشدده وصرت ادور في هالغابة وادور طرزان وما دريت الا بخشبة في راسي ومن قوة الطقه معاد ادري ويني فيه ويشيلوني فوق حصان اسود وانا مدري ويني فيه ويقوموني ويعطوني عصير برتقال وانا مدري ويني فيه << اعنبو ابليسك كل هالوصف وانت ما تدري وينك فيه ، وصلنا لعشة ريسهم لقيت جيوب مدرعه و( صبات ) جنب العشه وعلى طول من يوم شافني ريسهم قال ماعرفتوا هذا هذا الزق السكران مساحة الخال << العن ام الشهره ، وقال وش عندك هنا قلت انا جاي ابي طرزان علشان اخذ غسال فنيلته لابوي ، قال لي اهاااااا انت جاي لطرزان قلت نعم قال انت عارف ان طرزان الحين صار ارهابي وقصر تنورته ، ومرسل قبل كم يوم شريط صوتي يهدد فيه بتفجير اشجار الصنوبر ان ما طلع المشركين اللي جايين يصورون الحيوانات من الغابة ، شوي يوم خطف علينا طرزان متمسك في حبل ويقول ( ان ما طلعتوا المشركين بالعن والدا والديكم وبعدين منهو برميل الفسو اللي معكم ) قال الرئيس تراه يقصدك قلت يابن الحلال شف الحين يلعن ويتنابز بالالقاب وينه وين الدين هالاشخاص ابعد ناس عن الدين وبعدين قل له يعطني فنيلته واعطيه فسو مندي خخخخخخخخ ، وشوي الا طرزان خاطم علينا ثانيه بالحبل وتالني مع علباي ورايح بي معه لمكانه ويلبسوني تنورة حمراء وجلسوني قدامهم ووقفوا وراي وقاموا يقرون بيان انهم مسكوا سائق تريله تركي رهينه ، وانا بنقتله اذا ما طلعوا المشركين من الغابة خلال 22 ساعه ، والتفت عليه قلت ابو الطرز انت من جدك اعنبو ابليسك غرر بي ترى ما يبي لي شي كني ضب من يوم يغرونه وهو يطلع ، قال لي شوف انا ما راح اقتلتك اذا واعدتني انك تلغم نفسك وتروح لمكان الامريكان اللي يجون يصورون الحيوانات وتفجر نفسك عندهم علشان تروح للجنة على طول ، قلت طروزي وانت شايقي الجنه يعني مفاتيح الجنة معك ، يلعن ابو تفكيرك وش هالخيارات الحين ما راح تذبحني اذا فجرت نفسي خخخخخخ ، تصدق ياطرزان فعلا انتم يالارهابين اغبياء اول شي تقتلون انفسكم وهذا انتحار وانت عارف ان المنتحر ماله الا النار خالدا مخلدا فيها ، ثاني شي لو انكم تفجرون انفسكم وتموتون بس كان قلعتكم بس المشكله هالابرياء اللي يموتون معكم منهم هم اهلكم وحبايكم وجماعتكم ، لكن تدري انا كان ودي اخذ فنيلتك علشان اغسلها واعطيها ابوي لكن الحين لو يموت ابوي اهون علي من اني اخذ من وسخكم يالارهابين شي يدنس جسد ابوي الطاهر .
شوي الا مداهمة مسوينها جنود الغابة القوا فيها القبض على طرزان وجماعته وانا رجعوني بعد ما اعطوني فنيلة طرزان علشان اثبت لابوي ان سويت عمل بطولي ، رجعت للوطن الغالي وقابلت ابوي وشرحت له اللي صار وان هذه فنيلة الوسخ اللي باذن الله لو شرب غسالها بيطيب ، تحركت في جسم ابوي دماء الوطنية بعدها قام وخذ الفنيلة ورماها وضمني وقال كفو ياولدي البطل
موضوع: قصة فنيلة طرزان 
الأحد أكتوبر 14, 2007 2:10 pm
